امریکا کی سیاست میں ایک بار پھر ووٹ کی طاقت نے اپنی موجودگی کا احساس دلایا ہے۔ مڈٹرم انتخابات محض چند نشستوں کی تبدیلی کا نام نہیں ہوتے، یہ دراصل حکمرانوں کی کارکردگی پر عوامی ردعمل کا پیمانہ بھی ہوتے ہیں۔ صدر ڈونلڈ ٹرمپ ابھی اپنی صدارت کے دوسرے سال میں ہیں اور امریکی عوام نے ان کی جماعت کے لیے جو انتخابی صورت حال پیدا کی ہے، اس نے واشنگٹن کے سیاسی ایوانوں میں کئی نئے سوال کھڑے کر دیے ہیں۔
سوال صرف یہ نہیں کہ ڈیموکریٹس نے کتنی نشستیں حاصل کیں اور ری پبلکنز کو کتنی نشستوں کا نقصان ہوا، اصل سوال یہ ہے کہ کیا امریکی ووٹر ٹرمپ کی سیاست، ان کے طرزِ حکمرانی اور ان کی خارجہ پالیسیوں کے بارے میں اپنے تحفظات کا اظہار کر رہے ہیں؟ کیا دنیا کے مختلف خطوں میں محاذ آرائی، تجارتی جنگوں، سخت امیگریشن پالیسیوں اور مسلسل سیاسی کشیدگی کا اثر اب امریکی ووٹر کے فیصلے پر بھی پڑنے لگا ہے؟
امریکی سیاست کا ایک دلچسپ پہلو یہ بھی ہے کہ سابق صدر باراک اوباما نے انتخابی مہم کے آخری مرحلے میں میدان میں اترنے کا فیصلہ کیا۔ 24 اکتوبر کو اوباما کلیولینڈ اور ڈیٹرائٹ پہنچے۔ انہوں نے اوہائیو میں سینیٹ کے امیدوار شیروڈ براؤن اور مشی گن میں مسلمان امیدوار ڈاکٹر عبدال السید کی حمایت میں جلسوں سے خطاب کیا۔ اوباما نے ٹرمپ انتظامیہ کی پالیسیوں، ایران جنگ، مہنگائی، تجارتی محصولات اور حکومتی طرزِعمل پر سخت تنقید کی۔ انہوں نے مڈٹرم انتخابات کو ٹرمپ حکومت کے اختیارات پر ایک جمہوری بریک لگانے کا موقع قرار دیا۔ یہ محض ایک سابق صدر کی انتخابی سرگرمی نہیں تھی بلکہ ڈیموکریٹک پارٹی کی جانب سے اپنی سب سے مؤثر سیاسی آواز کو دوبارہ میدان میں اتارنے کی کوشش تھی۔
اور پھر نتائج سامنے آئے تو امریکی سیاست کا ایک اور منظر دیکھنے کو ملا۔ پاکستانی نژاد امریکیوں نے بھی اپنی کامیابیوں سے توجہ حاصل کی۔ پانچ پاکستانی نژاد امیدواروں نے مختلف ریاستوں میں کامیابی حاصل کی۔ کنیکٹیکٹ سے سعود انور اور مریم خان نے اپنی نشستیں جیتیں، ٹیکساس سے سلمان بھوجانی اور ڈاکٹر سلیمان لالانی کامیاب ہوئے جبکہ جارجیا سے فاروق مغل نے اپنی کھوئی ہوئی نشست دوبارہ حاصل کرلی۔ یہ پانچ نام اس بات کی علامت ہیں کہ امریکی سیاست میں پاکستانی نژاد شہری اب صرف ووٹر نہیں رہے بلکہ قانون سازی اور فیصلہ سازی کے اداروں میں بھی اپنی جگہ بنا رہے ہیں۔
مگر ان نتائج کا سب سے اہم پہلو صرف نسلی، مذہبی یا ثقافتی نمائندگی نہیں بلکہ وہ سیاسی پیغام ہے جسے سمجھنے کی ضرورت ہے۔ ڈیموکریٹس نے سینیٹ اور ایوانِ نمائندگان میں اپنی پوزیشن بہتر بنائی اور کئی ایسے انتخابی حلقوں میں کامیابی حاصل کی جہاں ری پبلکنز کو اپنی برتری کا یقین تھا۔ اس تبدیلی کے پیچھے مہنگائی، ایندھن کی قیمتیں، ٹیرف، جنگی پالیسی اور ٹرمپ حکومت کے بارے میں عوامی بے اطمینانی جیسے عوامل زیرِبحث رہے۔ امریکی خبر رساں ادارے ایسوسی ایٹڈ پریس کے تجزیے کے مطابق نتائج میں ٹرمپ سے متعلق عوامی ناراضی اور روزمرہ زندگی کے اخراجات نے بھی اہم کردار ادا کیا، تاہم اسے مستقل سیاسی تبدیلی قرار دینا ابھی قبل از وقت ہوگا۔
اب سوال یہ ہے کہ کیا ٹرمپ کی ہر معاملے میں محاذ آرائی کی سیاست امریکی عوام کو بھی تھکا رہی ہے؟ کیا ایران سے جنگ، تجارتی تنازعات، اتحادی ممالک کے ساتھ کشیدگی اور امیگریشن کے معاملے پر سخت رویہ امریکی ووٹر کے لیے بھی تشویش کا باعث بن رہا ہے؟ کیا امریکی عوام یہ سوچنے پر مجبور ہو رہے ہیں کہ دنیا بھر میں طاقت کا مظاہرہ کرنے سے پہلے اپنے گھر کے مسائل حل کرنا زیادہ ضروری ہے؟
ٹرمپ کی سیاست کا ایک بڑا دعویٰ امریکہ کو دوبارہ عظیم بنانے کا ہے۔ لیکن عظمت کا پیمانہ کیا ہے؟ دنیا کو اپنی طاقت دکھانا، دوسرے ملکوں کو دھمکانا، تجارتی پابندیاں لگانا اور ہر اختلاف کو محاذ آرائی میں تبدیل کردینا، یا اپنے شہریوں کو سستی زندگی، بہتر صحت، روزگار اور محفوظ مستقبل فراہم کرنا؟ یہ وہ سوالات ہیں جن کا جواب صرف انتخابی نعروں سے نہیں دیا جاسکتا۔
یہ بھی یاد رکھنا چاہیے کہ مڈٹرم انتخابات صدارتی انتخابات نہیں ہوتے۔ ان میں عوام صدر کا براہِ راست انتخاب نہیں کرتے بلکہ کانگریس اور ریاستی اداروں کے لیے نمائندے چنتے ہیں۔ تاہم ان انتخابات کے نتائج صدر کے لیے ایک سیاسی پیغام ضرور ہوتے ہیں۔ امریکہ میں یہ روایت بھی رہی ہے کہ صدر کی جماعت کو عموماً وسط مدتی انتخابات میں نقصان اٹھانا پڑتا ہے۔ اس لیے ہر نقصان کو صرف صدر کی پالیسیوں کا نتیجہ قرار دینا بھی درست نہیں ہوگا، لیکن جب کئی اہم ریاستوں میں نتائج ایک ہی سمت کا اشارہ دیں تو انہیں نظرانداز کرنا بھی آسان نہیں رہتا۔
پاکستان کے لیے بھی اس انتخابی منظرنامے میں ایک سبق موجود ہے۔ ہماری سیاست میں اکثر کسی شخص کی شناخت، مذہب، زبان، برادری اور خاندانی پس منظر کو اس کی قابلیت سے بڑا بنا دیا جاتا ہے۔ امریکی انتخابات میں پاکستانی نژاد امیدواروں کی کامیابی یہ بتاتی ہے کہ جمہوری نظام میں مسلسل سیاسی شرکت، عوامی رابطہ اور مقامی مسائل پر کام کرنے سے نمائندگی کا راستہ کھل سکتا ہے۔ یہ کامیابیاں صرف پاکستانیوں کے لیے خوشی کی خبر نہیں بلکہ بیرون ملک آباد پاکستانی کمیونٹی کی سیاسی موجودگی کا اعتراف بھی ہیں۔
باراک اوباما کی انتخابی میدان میں واپسی، پاکستانی نژاد امیدواروں کی کامیابی، نیٹو امریکن خواتین کی تاریخی پیش رفت اور ٹرمپ کی جماعت کو ملنے والا انتخابی دھچکا، یہ سب ایک ہی انتخابی منظرنامے کے مختلف رخ ہیں۔ اب دیکھنا یہ ہے کہ ٹرمپ اس عوامی پیغام کو کس طرح لیتے ہیں۔ کیا وہ اپنی پالیسیوں پر نظرثانی کریں گے یا اسی سیاسی راستے پر آگے بڑھیں گے جس پر چلتے ہوئے انہیں یہ انتخابی نتائج دیکھنا پڑے؟
امریکہ دنیا کی بڑی طاقت ضرور ہے، لیکن جمہوریت کی اصل طاقت اس کے صدر کے منصب میں نہیں، اس ووٹر کے ہاتھ میں ہوتی ہے جو وقت آنے پر اپنے حکمرانوں سے سوال بھی کرتا ہے اور اپنے ووٹ سے جواب بھی دیتا ہے۔ اقتدار کی کرسی کتنی ہی مضبوط کیوں نہ ہو، ووٹ کی پرچی اس کے نیچے موجود زمین کو ہلا سکتی ہے۔ شاید یہی مڈٹرم انتخابات کا سب سے بڑا پیغام ہے۔
اعلانِ دستبرداری: اس مضمون میں اظہار کیے گئے خیالات، آراء اور تجزیے مصنف کے ذاتی ہیں اور ضروری نہیں کہ ادارے، اس کی انتظامیہ یا ادارتی پالیسی ان سے متفق ہو یا ان کی تائید کرتی ہو۔
About The Author
